Сүнслэг аялал: Урлагаар дамжуулан сүнслэг дадалд өдөөх нь, олон ангит цувралын 6-р хэсэг

Гайхамшигтай, өнгөлөг, романтик лааны гэрэл ямар ч харанхуйг гэрэлтүүлж чадна. Бид гаднын хүчнээс гэрэл зээлдэх шаардлагагүй. Хайраар дүүрэн дотоод сэтгэлийнхээ галыг асааж, түүгээрээ өөрийгөө болон бусдыг эрхэм ариун зам руу чиглүүлэн хөтлөөрэй.

Дэлхийд нэрд гарсан сүнслэг багш, уран бүтээлч Төгс Гэгээрсэн Их Багш Чин Хай (веган) биднийг зөвхөн сүнслэг сургаалаараа төдийгүй гайхамшигт урлагийн бүтээлүүдээрээ гэгээрүүлдэг. Өнөөдөр бид Төгс Гэгээрсэн Их Багш Чин Хай (веган)-н туурвисан Тэнгэрийн Урлагийн Галерейгаар хамтдаа аялах болно. Их Багшийн уран бүтээлүүд Диваажингийн үзэсгэлэнг бүрэн илэрхийлж, дэлхийд адис авчирдаг.

Агуу уран зургууд бол хүн төрөлхтний эрхэм нандин өв юм. Бийрийн таталт бүр нь түүх, соёл, сэтгэлийн илэрхийлэл, тэр ч бүү хэл адисыг хүртэл шингээж байдаг бөгөөд биеэр туулаагүй өнгөрсөн, одоо, ирээдүйн замналыг бий болгон, сэтгэл оюуныг баяжуулдаг. Төгс Гэгээрсэн Их Багш Чин Хай (веган)-н ер бусын уран бүтээлийн авьяас зөвхөн Түүний төгс гэгээрсэн Билиг ухаанаас төдийгүй алдартай зураач, уран бүтээлч байсан онцгой өмнөх төрлүүдтэй нь холбоотой гэж үздэг.

VO: Сайн байцгаана уу, Суприм Мастер Телевизийн хамт олон? Суприм Мастер Телевизээр гарсан “Манай гаргийн эртний зөгнөлүүд” цувралын 228-р хэсэг болох “Италийн агуу уран зураач Леонардо да Винчийн зөгнөлүүд”-ийг үзэж байхад минь Төгс Гэгээрсэн Их Багш Чин Хай өнгөрсөн төрөлдөө Леонардо да Винчи байсан юм байна гэсэн бодол надад төрсөн юм. Түүний бүтээсэн олон бүтээл, ялангуяа уран зургуудыг эргэн санахад тэрээр өөрийн жинхэнэ мөн чанарыг Мона Лиза бүтээлдээ илэрхийлсэн байдаг. Энэ зураг миний хувьд үргэлж нууцлаг байсаар ирсэн. Учир нь олон урлаг судлаач Мона Лиза хэн болох, яагаад түүнийг зурсан болохыг тайлахыг оролдсоор ирсэн билээ. Олон жилийн өмнө би түүний хэн болохыг ойлгосон. Леонардо да Винчи өөрийгөө эмэгтэй дүрээр зурсан байсан. Гэвч яагаад тэгсэн шалтгааны нэг холбоос, нэг нууц хэсэг дутуу хэвээр байв. Мона Лизагийн инээмсэглэл Есүс (Төгс Гэгээрсэн Их Багш Чин Хай) эмэгтэй хүн болж эргэн ирэхийг харуулсан холбоос байсан бөгөөд Их Багш үргэлж сайхан инээмсэглэдэг.

“Дэлхийг аврагч”, “Сүүлчийн зоог” хэмээх бүтээлүүд нь эдгээр урлагийн бүтээлүүдийг үнэндээ хэн туурвиж байсныг дүрсэлжээ. Есүс Өөрөө Леонардо да Винчийн дүрээр эдгээр бүх урлагийн бүтээлүүдийг зурсан байна. Дахин нэг удаа Их Багш Өөрийгөө өмнөх төрөлдөө Леонардо да Винчи байсан гэдгийг надад харуулж, мөн нэвтрүүлгийг үзэж байх үед маш сонирхолтой нэг ойлголт орж ирсэн. Тэр нь Микеланжело Түүний ихэр сүнс байсан явдал юм. Нэг цаг хугацаанд амьдарч байсан хоёр уран бүтээлч боловч үнэндээ нэг л сүнс юм. […]

Өнөөдөр бүгдээрээ сүнсээ “сэрээж”, жинхэнэ гэр рүүгээ буцах сүнслэг аялалд хамт гарцгаая. Энэ замд биднийг гол замаас хазайлгаж болох “Өөр өөр хүслэн”-үүдийг ойлгохыг хичээх болно. Залуу сүнснүүдэд сургахын тулд Гэгээнтэн, Их Багш заримдаа шавь нараа баясгаж, урам өгөх гэж “Алиалагч”-ийн дүрийг хүртэл бүтээж болох юм. Бид бүгд жинхэнэ Их Багшийн асар их золиослолыг эрхэмлэн хүндлэх ёстой. Учир нь хэрэв Их Багш Өөрийгөө нууж, зөвхөн “Их Багшийн Гутал, Дэвүүр хоёр”-ыг үлдээгээд явбал бид дахин тийм амьд Их Багшийг хаанаас олох билээ?

Сүүдэр дүүрэн энэ дэлхийд бид ихэвчлэн гаднаас дулааныг эрж хайдаг. Гэвч хамгийн удаан асаж байдаг дөл бол дотоодоос минь олддог тэр гэрэл юм.

Гайхамшигтай, өнгөлөг, романтик лааны гэрэл ямар ч харанхуйг гэрэлтүүлж чадна. Бид гаднын хүчнээс гэрэл зээлдэх шаардлагагүй. Хайраар дүүрэн дотоод сэтгэлийнхээ галыг асааж, түүгээрээ өөрийгөө болон бусдыг эрхэм ариун зам руу чиглүүлэн хөтлөөрэй.

Энэхүү гүн гүнзгий билиг ухаан 1987 оны 4 сарын 25-нд Формосагийн Пэнхүд Төгс Гэгээрсэн Их Багш Чин Хай (веган)-н айлдсан айлдварт үндэслэсэн “Агшин зуур билиг нээгдэхийн түлхүүр” номоос эхтэй. Их Багш “Дээд Ертөнцийн Гэрэл” хэмээх ойлголтыг нууцлаг зүйл биш, харин дотоодын (Диваажингийн) Гэрэлд буцан очих үйл явц болохыг тун уран яруу тайлбарладаг. Одоо Түүний айлдварыг сонсоцгооё.

Master: Агуу бясалгагчид бүгд Гэрлийн тухай ярьдаг. Хятадын гэгээрэл гэсэн утгатай “Мин” ханз нь нар, сар гэсэн хоёр дүрсээс бүтдэг бөгөөд энэ нь Гэрлийг илэрхийлдэг. Тиймээс гэгээрэл гэдэг нь Гэрэл дотор оршихыг хэлнэ. Хэрэв Гэрэл байхгүй бол хүн яаж гэгээрэх билээ? Тиймээс гэгээрэл гэдэг нь Гэрэлтэй холбоотой байдаг. Өөрөөр хэлбэл Гэрлийг харах, өөрөөсөө Гэрэл цацруулах, эсвэл Гэрэлтэй холбогдохыг хэлнэ. Угтаа бид бүгд дотоодын Гэрэл, дотоодын Аялгуутай байдаг. Тэр нь бидний “Жинхэнэ Мөн Чанар”, эсвэл Буддын шашинд хэлдгээр “Буддагийн Мөн Чанар” юм. Есүс Христ айлдахдаа “БУРХАНЫ Орон та нарын дотор бий.” гэсэн. Шагжамуни Будда “Будда та нарын оюун санаанд оршино.” гэж айлдсан. Мөн Лао Цзы ч үүнтэй төстэй сургаал айлдсан байдаг. Тэрээр Даог гаднаас хай гэж бидэнд хэлээгүй. Мөн Даог олохын тулд уулс руу, гол мөрөн рүү мөргөл үйлдэн явах ёстой гэж ч хэлээгүй. Тийм биш гэж үү? “Дао Дэ Жин” буюу “Ариун чанарын судар”-ын гол утга санаа ч гэсэн Даог өөрсдийн дотоод мөн чанараас эрж хайх ёстойг илэрхийлдэг.

Их Багшийн уран яруу тайлбарласнаар Гэгээрэлд хүрэх зам бол алс холын газар руу хийх аялал биш, харин дотоодод орших Гэрэл рүүгээ буцан очих явдал юм. Үүнийг бид БУРХАНЫ Орон, Буддагийн Мөн чанар, эсвэл Дао гэж нэрлэсэн ч ялгаагүй энэ бол үргэлж биднийг чимээгүйхэн хамгаалж ирсэн Жинхэнэ Мөн чанар билээ. Тиймээс дотоод сэтгэл дэх энэхүү хайрын галыг асааж, жинхэнэ Гэр рүүгээ буцах замаа Гэрлээр замчлуулцгаая.

Эхлээд бид Их Багш болон Түүний шавь нарын хоорондын холбоог дүрсэлсэн гүн утга агуулгатай нэгэн бүтээлийг сонирхоцгооё.

Төгс Гэгээрсэн Их Багш Чин Хай (веган) энэ уран зургийг анх “Их Багш ба шавь нар” гэж нэрлэсэн ч дараа нь нэрийг нь “Өөр өөр хүслэн” болгон өөрчилсөн байна. Зурган дээрх хүн дотоодын Их Багшийг төлөөлнө, харин өөр өөр зүгт явж буй ноход Түүний шавь нарыг төлөөлдөг. Зарим үед Их Багш шавь нар нь Түүнтэй нэгэн цул болж, ижил эрхэм ариун үзэл зорилгын төлөө тэмүүлж чаддаггүйд харамсдаг. Хэтэрхий их би гэсэн үзэлтэй, итгэл нь дутмаг шавь нар энэ дэлхийн уруу таталт, нөлөөнд дэндүү амархан автдаг. Гэвч Их Багшийн гарт Өөрийг нь бүх шавь нартай нь холбосон нэгэн уяа бий. Эцэст нь Тэрээр бид бүгдийг анх ирсэн гэрт маань буцаан аваачих болно.

Энэ бол дүрслэлээс илүү утга санааг илэрхийлсэн хийсвэр зураг юм. Үүний бүх элемент буюу дүрүүд, амьтан-хүмүүс, одод гүн гүнзгий, тод утга агуулга агуулдаг. Энэхүү бүтээлийн хэв маяг нь яг л хувийн өдрийн тэмдэглэл мэт дотоод сэтгэлийн мэдрэмжийг маш тодорхой, ойлгомжтой илэрхийлдэг.

Өтгөн ногоон модод бидэнд амар амгаланг мэдрүүлдэг бол одод, сар нь завгүй ертөнцөөс түр холдон, бясалгал руу чиглэхийг бэлгэдэх ажээ. Үүний эсрэгээр зургийн баруун доод хэсэгт буй газрын өнгөнүүд өдөр тутмын амьдралын хүнд ачааг илэрхийлдэг. Мөн уяагаар хөтлүүлсэн нохой өөр тийш харж, амаа ангайлган анхаарал сарнисан байдалтай байгаа нь бид өдөр тутмын жижиг зүйлсэд хэрхэн амархан автагддагийг яг таг харуулж байна. Зураг дээр дүрүүдийн амин сүнсийг уран илэрхийлж, бидний сэтгэл доторх мөнхийн тэмцлийг нэг талаас сүнсний дотоод тэмүүлэл, нөгөө талаас ертөнцийн уруу таталтын хооронд татагдан оршдогийг харуулах ажээ.

Одоо “Алиалагч” хэмээх уран зургийг авч үзье. Энэ бүтээл нь Их Багшийн бэлгэдэлт өөрийн хөрөг зургийн хэв маягийн тод жишээ юм. Түүний гадаад төрхийг дүрслэхийн оронд алиалагчийн дүрийг ашиглан дотоод ертөнц болон Түүний түүхийг өгүүлжээ.

Их Багш өвдөж байсан ч, гунигтай байсан ч бусдыг баярлуулахын тулд инээмсэглэлээ хадгалах ёстой гэж Өөрийгөө алиалагчтай зүйрлэсэн байдаг. Шавь нар нь үүнээс ашиг хүртэж, итгэлээ хадгалан, сүнслэг замналаа баяр баясгалантайгаар үргэлжлүүлж чадаж л байвал энэ бүхэн Түүний хувьд хангалттай хэмээн Тэрээр үздэг юм. Зураг дээр алиалагчийн баруун талд тод, өнгөлөг өнгөнүүдийг, харин зүүн талд бараан, бүдэг өнгөнүүдийг ашиглажээ. Энэ нь алиалагчийн жинхэнэ мөн чанарыг илчилдэг. Гаднаа үргэлж баяр хөөртэй харагдавч дотроо заримдаа маш их ганцаардлыг мэдэрдэг.

Энэхүү бүтээл хүн төрөлхтөнд туслахын тулд эгэлхэн дүрээр энэ дэлхийд ирсэн Эрхэм Ариун Сүнс болох Их Багшийн дотоод ертөнцийг илчилж өгдөг.

“Их Багшийн гутал, дэвүүр хоёр” бүтээлд асар их нам гүм оршино. Энэ бүтээлийн цаадах түүхийг хэсэгхэн зуур сэтгэлээрээ мэдэрцгээе.

Төгс Гэгээрсэн Их Багш Чин Хай (веган) энэ бүтээлийг мацаг барин, дияан бясалгал хийж байх үедээ туурвисан юм. Гутал, дэвүүр хоёр нь Эзнээ чимээгүйхэн хүлээн буй мэт. Тэр үед дэлхий дээр сэтгэл эмзэглүүлэм олон үйл явдал өрнөж байлаа. Нэгэн орой нийтийн бясалгалын үеэр Их Багш танхимд чимээгүйхэн орж ирээд, ятга хөгжим тоглон, шавь нартаа уг зургийг анхааран хар гэж дохисон. Дараа нь ганц ч үг хэлэлгүйгээр танхимаас гарсан юм.

Гутал, дэвүүр хоёр бол Их Багшийн өдөр тутам хэрэглэдэг зүйлс байв. Тэдгээрийг Эзэнгүйгээр энд үлдээсэн байдлаар харах нь асар их гуниг хийгээд гүн утгыг агуулдаг. Бид энэ зургийг зүрх сэтгэлээрээ харах ёстой. Тэгж байж л үүнд нуугдсан аниргүй сургаалыг ойлгож чадна.

Энэ дүрслэлийн нам гүм байдал үгээр илэрхийлэх боломжгүй мэдрэмжийг илэрхийлдэг. Энэ нь дэлхийн шуугиан бужигнаанд хандах Их Багшийн дуугүйхэн урам хугарсан сэтгэл, орхин явах хүслийг нь тусгажээ. Үүний зэрэгцээ энэхүү уран зураг нь эцэс төгсгөлгүй бэрхшээлийг туулж, зөвхөн бүх сүнсийг чөлөөлөх хүсэлдээ хөтлөгдөн, уул ус, зам харгуйгаар аялсан Нэгний түүхийг өгүүлдэг.

Энэ бүтээл бидэнд гэгээрсэн Их Багштайгаа өнгөрүүлэх агшин бүрийг эрхэмлэн нандигнахыг сануулдаг. Бид Түүний оршихуйг дээдлэн, Түүгээр хөтлүүлж, дэвшин дээшилж, сүнсээ жинхэнэ Гэр рүүгээ буцаахад замчлуулах ёстой.

Уран зургийн талаас нь авч үзвэл энэхүү бүтээл энгийн эд зүйлсээр гүн мэдрэмжийг илэрхийлэх гайхамшигтай хүчтэй. Энэ үнэхээр сод бүтээл юм. Агуу урлагт заавал нарийн төвөгтэй шугам дүрслэл, баялаг өнгө шаарддаггүй. Харин ч гэнэтхэн өөрийг тань алмайруулж, сэтгэлийн гүнд хурц бөгөөд хүчтэйгээр хүрч чаддаг. Энэ нь сүнс тань үнэхээр гүн хөндөгдсөн болохыг сануулах сайхан мэдрэмж юм.