Дэлгэрэнгүй
Татаж авах Docx
Дэлгэрэнгүй уншаарай
Сайн байцгаана уу, шавь нар болон шавь биш бүх ариун сэтгэлт хүмүүс минь? Та нар миний шавь гэгддэг ч бай, үгүй ч бай, ямар ч сүсэг бишрэлтэй бай, бүр огт шүтлэггүй ч бай би алагчлалгүй хайрлаж, зовлонг тань хуваалцаж байдаг шүү. Та нар БУРХАНЫ нөхцөл болзолгүй Хайр, БУРХАНЫ Адислалыг хаана ч явсан үргэлж санаж байх болтугай. Үүнийг л битгий мартаарай. Тэгвэл энэ насны амьдрал тань сайжирч, мөн дараа дараачийн төрөлдөө Тэнгэрлэг баясал, аз жаргал, амгаланг олох нь гарцаагүй. Энх тайвны талаар дахин жаахан яримаар байна. Учир нь та бүхний ихэнх нь үүнийг мэдэхийг хүсдэг. Та бүхний харж байгаачлан, энх тайван бүрэн тогтоход улам бүр ойртож байна. Гэвч энэ нь та бүхний хүлээлт, итгэл найдвараас ч, мөн миний хүссэнээс ч хэтэрхий удаан явагдаж байна. Надад итгээрэй, би энх тайвныг та нараас ч илүү ихээр хүсэн хүлээж байгаа. Гэсэн ч би ядаж амьд мэнд байж, энэ бүх дэвшилтэт технологийн ачаар та нартай ярих боломжтой байгаадаа талархаж байна. Бид технологийн ноёрхлын оргилд хараахан хүрээгүй ч хэдэн зуун жилийн өмнөхөөс хавьгүй дээр болжээ. Өөрт байгаа бүхэндээ үргэлж талархаж байгаарай. Энх тайван тогтнох гэж хэтэрхий удаж байна. Үүнд олон шалтгаан бий. Хүмүүс энэ дэлхийд төрөхдөө угаасаа бүрээс ч гэмээр юм уу, нэгэн төрлийн бүрхүүл шиг зүйлээр тэр чигтээ хүрээлэгдсэн байдаг. Тэр ч бүү хэл урьд төрлүүдийнхээ үйлийн үр, тэрхүү төрлүүдэд учирсан хүмүүстэй ямар барилдлагатайгаасаа шалтгаалж тэд бүр давхар бүрээстэй, жишээ нь манай дэлхий шиг ертөнц болж бүрэлдсэн, илүү том давхар бүрхүүлтэй байдаг. Хүн бүр өөрийгөө хүрээлсэн бүрхүүлтэй явдаг бөгөөд түүнээсээ зайлж зугтаж чаддаггүй, харин тэд эргэн тойронд тань энгийн хүмүүс шиг л харагдана. Хүмүүс хамаг л ердийн зүйлийг хийгээд явж байвч тэр бүрхүүлийг харж чаддаггүй. Үүнд л асуудал байгаа юм. Тэрхүү бүрхүүлийг бид үйлийн үр гэж нэрлэж болно. Харин илүү том бүрхүүлийг хамтын үйлийн үр гэдэг. Энэ нь хүн бүр өөрийн үйлийн үрээс энэ ертөнцөд бага багаар нэмэрлэн оруулж, тэгснээрээ бүх нийтийг бүрхэн, нэг нийгэм болгосон тэрхүү том бүрхүүлийг үүсгэсэн гэсэн үг. Яг одоогийн манай гараг шиг. Том болон жижиг бүрхүүлээс хэзээ нэгэн цагт чөлөөлөгдөх нь маш хэцүү, бараг боломжгүй. Гэсэн ч бид үүнийг үргэлж сайжруулж, дээшлүүлж чадна. Тэгснээр сайжруулаагүй байснаас илүү их эрх чөлөөтэй болно. Бид үүнийг ёс суртахууны хэм хэмжээ, веган хооллолт, нийгмийнхээ төлөө хэрэгцээтэй хэн бүхэнд зориулсан сайн үйлсээрээ, мөн бидэнтэй нэгэн бүрхүүлд оршдог амьтан-хүмүүс болон бүх төрөлтнийг хайрлаж, хамгаалснаараа сайжруулдаг. Энд бүрхүүлтэй л төрдөг ёстой. Тэгээд бүгдийг нь хүрээлсэн тэрхүү том бүрхүүлийг бүтээхэд цугаараа ямар нэг зүйл нэмэрлэдэг. Зарим нь илүү их, зарим нь бага нэмэрлэнэ. Үйлийн үр нь хэр хүнд, хөнгөнөөс хамаарна. Гэвч хэн ч өөрийн хувийн бүрхүүлээс, эсвэл бүгдийг нь хүрээлдэг, хүрээлэх ч биш, бүр бүгдийг нь бүрхдэг тэр том бүрхүүлээс зугтаж чадахгүй. Иймээс тэд нэг ертөнцөд хамт байж, идэвхтэй амьдарч буй мэт харагддаг ч угтаа бүгд нэг шоронд, том шоронд хоригдсон байдаг. Мөн нэг бүрчлэн тус тусдаа хоригдсон, гэрийн хориотой төстэй байдалд байдаг. Тэднийг энэ бүрхүүлээс гарахад тусалж чадах цорын ганц зүйл бол Их Багшийн Хүч юм. Хэрэв тэд Их Багштай болох, Их Багшид итгэх, мөн Их Багшийн заасныг хэрэгжүүлэх хувь заяатай бол чөлөөлөгдөж чадна. Тэгээд хэрэв үргэлжлүүлэн илүү их үйлийн үр хураахгүй бол энэ биет оршихуйн түвшинд дахин бууж ирэх шаардлагагүй болно. Харин дэвшиж, Гэртээ харих замаа олно. Гэр гэдэг нь ганцхан гэр биш, олон олон гэрийг хэлж байгаа юм. Зарим нь сүнслэг түвшнээр доогуур, зарим нь өндөр, зарим нь дундаж түвшнийх. Дээш өргөгдөн дэвшдэг хүмүүс хоёр төрлийнх байдаг. Нэг нь үйлийн үрээрээ, сайн үйлийн үр буюу урьд болон энэ төрөлдөө хаа нэгтээ тогтоосон номын барилдлага, бясалгал дадлын улмаас дэвшинэ. Нөгөө нь төгс туулж гэтэлсэн Бурханы бүх бүтээл эхлэхээс өмнө агуу Гэр рүүгээ буцах замдаа явж байсан. Тэр бол та нарын Гэр, жинхэнэ Гэр тань. Харин зөвхөн БУРХАНЫ томилсон амьд сэрүүн Их Багш, жинхэнэ Их Багшийн Ивээл, Хүчээр та энэ төрөлдөө Тэдний түвшинд хүрч чадна, эсвэл энэ төрлийнхөө дараа Гэртээ буцах аяллаа үргэлжлүүлж бас болно. Эдгээр хүмүүсээс бусад нь үйлийн үр нь хаашаа хөтөлнө, тийшээ л явах ёстой. Там руу, эсвэл доод Тэнгэрийн орон, дээд Тэнгэрийн орон, эсвэл хүрч болох хамгийн боломжит дээд Тэнгэрийн орон гэх мэт. Тэнгэрийн орон гэдэг нь манай ертөнцийн дараагийнх болох Асурийн Ертөнцөөс эхэлнэ. Асурийн Ертөнц олон түвшинтэй. Хэдэн зуугаас ч олон. Хамгийн доод түвшин нь там юм. Харин дээд Тэнгэрийн оронд клиник үхэлд орсон (аливаа зүйлтэй учирсан) гэгддэг хүмүүсийн ихэнх нь очиж, дэлхий дээр буцаж ирээд бусад хүмүүст тэр тухай бүхнийг ярьсан байдаг. Тиймээс клиник үхэлд орсон хүмүүсийн үзсэн харсан зүйл олон янз байдаг. Сүнсний түвшин өндөр шилдгүүд нь Хоёр, эсвэл хамгийн цаад тал нь Гуравдугаар Түвшинд хүрч чадна. Эдгээр хүмүүсийг гэтэлгэн чөлөөлөх Их Багшийн Хүч, Их Багшийн Ивээл байхгүй бол тэд буцаад ирдэг. Гурав, Хоёр, эсвэл Асурийн Түвшнээс бүгд буцан ирж, хэзээ нэгэн цагт БУРХАНААС томилогдсон жинхэнэ гэгээрсэн Их Багш тэднийг бүрэн чөлөөлөх хүртэл аяллаа дахин үргэлжлүүлнэ. Эд бол хамгийн хувьтай, хамгийн ихийг туулж хатуужсан сүнснүүд юм. Бид энх тайванд хүрсэн ч хязгаарлагдмал гурван ертөнцөөс чөлөөлөгдөж чадахгүй. Гэсэн хэдий ч энх тайван байвал хүмүүс илүү завтай, илүү амар амгалан, сэтгэл тайван байж, энэ биет ертөнцөөс цааш өөр юу байдаг талаар бодож магадгүй. Гэхдээ бас дайны үед үүнтэй төстэй, бүр ч илүү хүчтэй нөлөө байж болох юм. Учир нь дайн дажин дунд байгаа хүмүүс айж, бие махбодын амьдралын мөнх бусыг ухааран, жинхэнэ амар тайванд тэмүүлэх хүсэл нь илүү хүчтэй болж өдөөгдөж магадгүй. Тэр амар тайвныг бид зөвхөн илүү дээд Тэнгэрийн Оронд л олж чадна. Асурийн Ертөнц дэх доогуур Тэнгэрийн оронд ч дайн болж байж магадгүй тул тэнд бүрэн энх тайван байхгүй. Учир нь ихэнх хүмүүст өөрсдийг нь бүрэн ариусгаж, чөлөөлөгдсөн сүнснүүдэд зориулсан давуу эрхийн тусгай замаар хөтлөх амьд Их Багш байдаггүй. Зөвхөн Асурийн ертөнцөд ч биш, энэ дэлхийд хүмүүс, амьтан-хүмүүс холилдсон янз бүрийн төрөлтөн байдаг юм. Тиймээс энх тайванд хүрэхэд илүү хэцүү. Учир нь дайны үед, эсвэл туйлын зөрчилдөөний үед энэ ертөнцөд энх тайван бий болгохыг хүссэн хэн боловч өмнөх төрлөөс, эсвэл өөр ертөнцөөс ирсэн аливаа дайсагнал, аллагын үйлийн үрийг чөлөөлөхийн тулд тоо томшгүй олон янзын зангилааг тайлах ёстой. Зарим хүмүүс өөр гараг, өөр ертөнц зэргээс ирж төрдөг. Тиймээс тэд өөр өөр үйлийн үртэй байна. Сүнс нь бүрэн амгалан, бүрэн тайван, бүрэн жаргалтай. Гэвч тэд энэ ертөнцөд, эсвэл өөр ямар ч гараг ертөнцөд ирэхдээ бие махбод буюу биет хамгаалалттай байх ёстой. Учир нь энэ ертөнц сүнсний хувьд тэсвэрлэхийн аргагүй муухай. Ямар ч сүнс өөрийн сонгосон согог буюу урьд төрлийн үйлийн үрээс үүдсэн бүрхүүлгүйгээр биежсэн төрөл авч чадахгүй. Тэд бүгд бүрхүүлтэй байх бөгөөд биет түвшинд үргэлжлүүлэн оршин тогтноход нь таарч тохирох ертөнцөд тэднийг байршуулдаг. Учир нь төрлөөс төрөлд сүнс бүрхүүл дотор оршсоор ирсэн. Энэ бүрхүүл дотор холилдон хүний оршихуйг бүрдүүлж буй оюун ухаан, бие махбод, сэтгэл хөдлөл, авир араншин зэрэг элдэв бүх зүйл тэдэнд байх ёстой болно. Энэ бүхэн байгаа учраас тэд эргэн тойрныхоо бусад хүмүүстэй харилцдаг. Тэрхүү хоорондын харилцаа нь зөрчил, хайр, сэтгэлийн хүлээс, хамтын ажиллагаа зэргийг бий болгоно. Үүний улмаас бүр их үйлийн үр бий болсоор байдаг. Ийм төрлийн тогтолцоо нь юмыг бүр ээдрээтэй болгоно. Photo Caption: “Тэнгэр ба Газар хүртэл таныг баярлуулахын тулд хамтран ажиллахад бэлэн байна.”
